3ja-bíla-játning

Í bloggi dagsins ætla ég að gera smá játningu, en fyrst verð ég að segja að prófið í skólanum í kvöld var mjög stutt og lauflétt, verð virkilega fúl ef ég fæ ekki 10. En þá er komið að játningunni: ÉG Á NÚNA 3 BÍLA!!!! Ég keyri strætó alla daga og má ekkert vera að því að keyra einkabíl, hvað þá bílA. Ég fer alltaf í strætó í vinnuna og þarf ekkert að eiga svona marga bíla. En Birna lét mig hafa bílinn sinn, hún er hætt að nota hann. Þetta er Toyota Corolla árgerð 1993. Ég ætla að fara með hann í skoðun og svo ætla ég að selja hann. Vínrauður og fallegur bíll, bara búið að keyra hann 165 þúsund km. Ný kúpling, nýtt púst, ný framrúða o.fl. Ég ætti að fá a.m.k. 150 þúsund fyrir hann þegar hann er kominn með 09-miða. En ég er búin að setja sjálfa mig í tímabundið bílakaupabindindi

Próf á morgun!

Á morgun er fyrsta prófið í skólanum hjá mér. Var ég annars ekki búin að tilkynna að ég er á bókhaldsnámskeiði í tölvuskólanum Þekkingu? Þetta er 100 tíma námskeið, byrjaði 3.mars og endar 26.apríl. Ég læri verslunarreikning, bókhald og Navision.  Kostar ekki nema 94 þúsund krónur. Ég ætti að verða mikið betri vagnstýra þegar námskeiðið er búið, eða ætti ég kannski að finna mér einhverja aðra vinnu? Jæja, ég hef ekki tíma til að hugsa um það núna, verð að fara að reikna fullt af dæmum til fá ekki 0 á prófinu á morgun.

Mini Hulda

Hér er mynd af ófæddu barnabarni mínu. Hulda fór í þrívíddarsónar og fékk nokkrar myndir af barninu sem fæðist eftir ca. 11-12 vikur. Hún fékk að vita kynið en ég ætla ekki að upplýsa um það hér en smá-vísbending: Hulda fór í Smáralindina í dag og keypti slatta af bleikum barnafötum í dag. Ég ætla svo að kaupa bleikt garn og prjóna eitthvað fallegt handa barninu. En nánari fréttir af því síðar

GPS

Ég fór í innflutningspartý til Hörpu skákvinkonu minnar í kvöld (föstudagskvöldið 7.mars) Hún og maðurinn hennar voru að flytja í glænýja íbúð í Kópavoginum; Vindakór 9-11. Það gekk ágætlega að finna Vindakórinn, Valdimar var með mér og hann hefur áður keyrt inn í þetta hverfi en ég hafði aldrei stigið fæti í þetta póstnúmer (203), a.m.k. ekki svo ég viti. Við vorum með GPS-tækið okkar en Íslandskortið kom ekki upp, við gátum ekki slegið inn heimilisfang, Evrópukortið var yfirgnæfandi. Anna, hvað þarf að gera til að þetta virki eins og maður vill að það virki? Þegar við fórum heim var ekkert mál að fara í favourites og slá inn "heima er best" og konan sagði mér að turna left og leiðbeindi mér út úr öllum hringtorgunum, eru kannski flestir sem þagga niður í konunni? Hvernig er það gert? En það var komið myrkur þegar við fórum heim og ég er alveg handviss um að við spöruðum smá olíu á að vera með gps-tækið, við fórum beinustu leið heim, villtumst ekkert. Ef ég hefði verið ein, ekki með neitt gps-tæki og engan Valdimar væri ég kannski ekki ennþá komin heim... En nú ætla ég að fara að sofa, skóli í fyrramálið

Smá loforð

Ég hef fengið ábendingu um að ég hafi ekki bloggað neitt að undanförnu. Ég ætla nú aldeilis að bæta úr því og lofa hér með að koma með a.m.k. eina nýja færslu á dag næstu vikuna.

Hyundai Elantra árgerð 2002

Jæja, nú er ég búin að kaupa 1. bílinn á þessu ári. Ég keypti Hyundai Elöntru sem var auglýst á barnaland.is. Bílinn er mikið keyrður (108500 km) það er mjög gaman að keyra hann en fólkið sem átti hann vildi losna við hann til að geta keypt sér Patrol. Ég borgaði 257 þúsund krónur fyrir þennan bíl og auk þess borgaði ég eigendaskiptin sem er kr. 2530,-. Ég er mjög ánægð með þetta allt saman og held að ég sé næstum búin að jafna mig á einhverjum árekstri sem mig minnir að ég hafi lent í fyrir nokkru síðan. Viðmiðunarverð á svona bílum er 666.000,- á síðu Bílgreinasambandsins

  

 

 

 

 

 

                                                                      

Gámaþjónustan

Í gær var ég eitthvað að segja að ég ætlaði að fara að leita mér að annarri vinnu, núna er ég alveg ákveðin í að drífa í því. Ég lenti nefnilega í mjög óskemmtilegu atviki í morgun. Morguninn byrjaði eins og venjulegur morgunvaktarmorgunn, ég vaknaði kl. 5:30, klæddi mig í uniformið, fékk mér morgunmat, var komin í Mjóddina kl.5:59 og fór með sækingarvagninum upp á Hestháls og var komin þangað kl.6:20. Ég keyrði leið 12 í morgun og byrjaði í Skeljanesi kl 7:07. Þegar ég kom á stoppistöðina í Lækjargötu við MR kl.7:14 lenti ég í því að bíll frá Gámaþjónustunni keyrði fyrir mig og ég lenti á honum. Hann fór fram úr mér og beygði upp Amtmannsstíg og varð ekki var við áreksturinn. Framrúðan brotnaði í vagninum hjá mér og glerbrotum og fínum glersalla rigndi yfir mig. Ég fékk áfall en rétt gat séð að það var stór, blár bíll frá Gamaþjónustunni sem keyrði fyrir mig, ég sá ekki númerið á honum því að hann keyrði svo hratt. Ég hringdi í stjórnstöðina í Mjódd og tilkynnti um hvað hafði skeð og reyndi að vera alveg róleg þegar ég sagði varðstjóranum frá þessu og varð mjög undrandi þegar hann bað mig um að róa mig aðeins! Ég beið svo í 25 mín. eftir löggunni, en ég veit ekki hvað margir biðu eftir vagninum, sjálfsagt hafa einhverjir mætt of seint í vinnuna í dag. Varðstjórinn í Mjódd hringdi strax í Gámaþjónustuna og þeir fundu út hvaða bíll var þarna á ferðinni. Bílstjórinn hringdi svo alveg miður sín í stjórnstöðina og baðst margfaldlega afsökunar á þessu. En dagurinn var alveg ónýtur hjá mér (og vagninn skemmdur)

 

Til hamingju með nýjasta borgarstjórann!

Ég óska ykkur öllum innilega til hamingju með nýja borgarstjórann. Mér lýst samt ekki vel á þetta samstarf frjálslyndra og sjálfstæðismanna. Í málefnasamningnum er nefnilega eitt atriði sem virkar illa á mig: það á að vera ókeypis í strætó fyrir börn, unglinga, aldraða og öryrkja. Strætisvagnar eiga eftir að breytast í félagsmiðstöðvar fyrir unglingana. Litlir krakkar eiga eftir að stelast í strætó í tíma og ótíma án þess að foreldrarnir viti af. Öryrkjar eiga eftir að sitja í vögnunum heilu dagana, til að drepa tímann. Og gamla fólkið á eftir að flykkjast í strætó bara af því að það er ókeypis. Ég sé alveg fyrir mér allt gamla fólkið sem er orðið svo gamalt að það getur varla hreyft sig og varla komist inn í strætó, þetta fólk á allt eftir að flykkjast í vagnana og við vagnstjórarnir verðum að bíða og bíða á meðan þetta fólk kemur sér inn og út. Allar tímaáætlanir eiga eftir að fara úr skorðum.  Bráðlega fer ég að leita mér að annarri vinnu  

Garðabraut 22, Akranesi

Það er búið að vera svo mikið að gera hjá mér í janúar að ég hef ekki haft tíma til að kaupa bíl, núna þegar ég er loksins laus úr álögunum (áramótaheitið 2006-2007). Ég hef verið að hjálpa Huldu, dóttur minni, að finna og skoða og kaupa íbúð. Það er betra að hafa öruggt húsnæði þegar barnið fæðist! Hulda og Ingimar kaupa sem sagt 3ja herb. íbúð á Akranesi, á kr. 15.400.000,00

 En ekki flýta ykkur í heimsókn, þau flytja í apríl! Barnið fæðist svo í maí eða júní. Þá verður gaman

Skoðun

Ég vaknaði tiltölulega snemma í morgun, þarf ekki að fara að vinna fyrr en kl. 18:30 í kvöld og hvað var það fyrsta sem mér datt í hug að gera í dag? Auðvitað að fara með jeppann í skoðun! Ég dreif mig upp á Hestháls með jeppann, hann fór á vörubílabrautina og fékk 09-miða en ég þarf að láta yfirfara skökkvitækið og sjúkrakassann (ábending). 

Mér fannst 08-miðinn fara jeppanum betur, guli liturinn á 09-miðanum passar ekki við vínrauða litinn á jeppanum. En það er víst ekkert hægt að gera við þessu.

 Valdi fór með bílinn sinn og fékk 09-miða. Hvernig finnst ykkur guli liturinn fara við grá-sanseraðan bílinn? Kannski er hægt að venjast þessu.