Ferðalag Dagur 5

Jæja, við vöknuðum um fimm-leytið um morguninn við það að okkur var kalt. Miðstöðin í fellihýsinu var hætt að hita. Eftir smá-athugun fundum við út að rafmagnið var búið, við fórum að sofa aftur en um kl.8 fórum við á fætur og ætluðum að hita okkur vatn í kaffi, en þá uppgötvuðum við að gasið var líka búið! Hrikalegt ástand. Við fórum í tjaldmiðstöðina og keyptum okkur kaffi. Við urðum svo að færa fellihýsið að rafmagnsstaur til að geta hlaðið rafgeyminn. Svo lögðum við af stað norður Strandir. Fyrsta stopp var á Djúpuvík, fengum okkur kaffi á hótelinu þar. Ég tók nokkrar myndir og svo héldum við áfram og stoppuðum næst á Gjögri. En þar var ekki mikið að sjá svo við héldum áfram. Mér fannst mjög gaman að koma til Trékyllisvíkur en þangað fór ég á sveitaball fyrir u.þ.b. 27 árum, skemmtilegur staður! (ekkert að sjá)

Krossaneslaug. Ótrúlegt fjölmenni þar miðað við hvar sundlaugin er staðsett. Við fórum ekki útí.

Héldum áfram og komum í Ingólfsfjörð.

Í Ingólfsfirði fór fram atkvæðagreiðsla og var fellt með öllum greiddum atkvæðum að fara í Ófeigsfjörð, við neyddumst því til að snúa við.

En það var bara notalegt að koma aftur til Hólmavíkur og hitta fullhlaðið fellihýsi, við keyptum gas og elduðum rosalega góðan mat handa okkur. Á tjaldsvæðinu voru strákar að leika sér með bolta, en eftir að ég tók boltann af þeim færðist ró yfir svæðið.

Við sofnuðum alveg áhyggjulaus, með fullhlaðinn rafgeymi og fullan gaskút.

Ferðalag Dagur 4

Þegar við vöknuðum heyrðum við að það var byrjað að rigna, en það var ekki eins og við bjuggumst við eftir að hlustað á veðurspár í útvarpinu í gær. En við gátum lítið gert við því nema að taka saman. Við hættum við að fara út í Skálavík og upp á Bolafjall, vegna þokunnar. Áður en við yfirgáfum Bolungarvík keyrðum við um þorpið og leituðum að hjólbarðaverkstæði, fundum bara eitt slíkt en það var lokað en gefin upp 5 símanúmer sem mátti hringja í, við hringdum ekkert en yfirgáfum staðinn og fórum til Ísafjarðar, leituðum ekki að hjólbarðaverkstæði þar, fórum bara í Bónus og keyptum mat. Súðavík var næsta stopp, við tókum nokkrar myndir þar og héldum svo áfram inn Ísafjarðardjúp. Ótrúlega margir firðir, t.d: Álftafjörður, Seyðisfjörður, Hestfjörður, Skötufjörður, Mjóifjörður og Ísafjörður. Fórum svo Steingrímsfjarðarheiði og komum til Hólmavíkur um kl. 18:00. Flott tjaldsvæði þar, völdum okkur stæði og reistum fellihýsið. Fórum svo að skoða þorpið. Sáum hjólbarðaverkstæði en það var opið til kl. 18 og við vorum þarna kl.18:30, eigandinn var fyrir utan, við töluðum við hann og hann sagði að það væri lokað en möguleiki að kalla hann út. Við sáum enga ástæðu til þess þegar maðurinn stóð fyrir framan okkur og ákváðum að hafa dekkið sprungið áfram. Við fórum aftur á tjaldsvæðið, grilluðum kjöt, suðum kartöflur og borðuðum yfir okkur. Spiluðum heilmikið og fórum svo að sofa rétt eftir miðnætti alveg grunlaus um hvað biði okkar um nóttina...

Ferðalag Dagur 3

Við vöknuðum á svipuðum stað og við sofnuðum, þ.e.a.s. Patreksfirði. Fengum okkur kaffi í rólegheitum, veðrið var alveg ágætt en svo festum við fellihýsið aftan í jeppann og fórum að eyða olíu. Fyrst fórum við til Tálknafjarðar, þar var allt með kyrrum kjörum svo við skelltum okkur yfir Hálfdán og vorum svo allt í einu skyndilega komin til Bíldudals. Þar var allt enn rólegra en á Tálknafirði, t.d. er engin bensínstöð í pleisinu, bara einn sjálfsali Það voru útlendingar að reyna að kaupa bensín en voru ekki með nein kort, bara seðla, þau voru í stökustu vandræðum en svo kom ég með VISA-kortið mitt og bjargaði þeim. Við hliðina á bensínsjálfsalanum er veitingastaður og þar er hægt að kaupa ýmsar matvörur og svo er hægt að fá sér hamborgara og franskar (ég gat ekki sleppt því) svo við fengum okkur að borða þarna og svo var ferðinni heitið í Selárdal. Við geymdum fellihýsið á Bíldudal á meðan við fórum þangað. Í Selárdal var mjög gaman að skoða öll listaverkin hans Samúels, þetta er alveg ótrúlegt. Uppsalir eru svo aðeins innar í dalnum, við létum okkur nægja að skoða fjárhúsin hans Gísla, þau eru orðin dálítið hrörleg svo ekki sé meira sagt.

   

 

 

 

Fjárhúsið Uppsölum Selárdal.

 

Fórum svo til baka og fundum fellihýsið okkar, fórum Dynjandisheiði, keyrðum framhjá Hrafnseyri og komum svo til Þingeyrar. Þar fórum við inn á ENN-EINA-bensínstöðina og eyddum smá-peningum, Fórum svo til Flateyrar, þar var ágætt tjaldsvæði en við ákváðum samt að fara í Tungudalinn en það var svo mikið af fólki þar og okkur fannst ekki vera pláss fyrir okkur þar þannig að við fórum til Bolungarvíkur. Þar var gott tjaldsvæði við sundlaugina og við plöntuðum okkur þar. Svo fórum við að skoða sundlaugina og eftir að hafa tekið eftir að rennibrautin er ekki enn tilbúin til notkunar var ákveðið að láta nægja að fara bara í sturtu þarna.

Þetta er rennibrautin

sem var ekki tilbúin til notkunar.

 

 

 

Við fórum svo bara snemma að sofa til að vera í formi til að kíkja á Bolafjall og Skálavík daginn eftir.

Ferðalag Dagur 2

Vöknuðum í góðu veðri. Eftir að hafa fengið okkur kaffi tókum við saman og fórum frá Reykhólum. Ferðinni var heitið alla leið út á Látrabjarg. Við lentum í því að það sprakk á fellihýsinu á leiðinni þangað. En vegirnir eru bara svo leiðinlegir á Barðaströndinni.

Ég tók nokkrar myndir af lundanum. 

 

 

 

 

 

Hótel Breiðavík

 

 

 

 

                                                                                                           Samgöngusafnið, Hnjóti

Kíktum svo á Rauðasand, en slepptum að fara í Hænuvík. Förum þangað seinna.

Fórum svo til Patreksfjarðar og þar er ágætt, ókeypis tjaldsvæði, stór flöt sem hallar ekkert. Ákváðum að vera þar um nóttina. Fengum okkur bjór og hvítvín eftir matinn og sofnuðum svo fljótt og örugglega!

Ferðalag DAGUR 1

Lögðum af stað þriðjudaginn 24.júlí kl.14:30. Komum við í Bónus Mosfellsbæ og keyptum smá-mat í kæliboxin. Keyptum svo gaskút á fellihýsið og fylltum jeppann af olíu. Fórum svo norður eða kannski vestur, áfangastaðurinn var Reykhólar. Þar er mjög gott tjaldsvæði við Grettislaug. Grilluðum kjöt, suðum kartöflur og bjuggum til bernaise-sósu. Mjög góður matur!!                                                                     Takið eftir spilinu framan á jeppanum. Alveg bráðnauðsynlegt að hafa svona spil í öllum ferðalögum!   Við vorum líka með öðruvísi spil. Eftir að hafa spilað heil-lengi fórum við að sofa og ég held að við höfum bara sofið ágætlega. En þegar ég var þarna um verslunarmannahelgina 2003 svaf ég í tjaldi en í tjaldvagni við hliðina svaf maður sem hraut svo hátt að ég gat lítið sofið um nóttina. Ég hef aldrei heyrt aðrar eins hrotur. En það furðulega við þetta var að maðurinn var með konu og tvö börn með sér, þau sváfu öll í tjaldvagninum og um morguninn þegar ég fór á fætur var þessi fjölskylda þarna og lét eins og ekkert væri, ég ætlaði að spyrja þau hvers vegna í andskotanum þau hefðu ekki varað mig við þessum hávaða þegar ég var að tjalda við hliðina á þeim en áður en ég hellti mér yfir þau voru þau búin að pakka saman og farin. En núna voru engir nágrannar og við gátum sofið á hrotulausu tjaldsvæði.                                           

Ferðalag framundan !!

Jæja, bráðum fer að líða að því að haldið verði af stað í ferðalag á Landcruiser með fellihýsi í eftirdragi. En hvert verður farið er alveg óákveðið ennþá. Það fer eftir veðri og vindum! Meira seinna...