Þakgil

15.ágúst fórum við í stutt ferðalag á Landcruiser með fellihýsið í eftirdragi. Við fórum í Þakgil og vorum þar eina nótt. Til að komast í Þakgil er best að keyra til Víkur í Mýrdal og áfram austur ca. 5 km og þá birtist skilti sem vísar veginn til Þakgils. Það eru ca. 14 km frá þjóðvegi 1. Þetta er stórsniðugt tjaldsvæði sem óhætt er að mæla með. Ég ætla ekki að reyna að lýsa þessu með orðum en bendi á myndirnar í albúminu sem heitir Þakgilsferðalag. Við eigum örugglega eftir að fara þangað aftur, því að rétt hjá Þakgili er vegur sem er sérhannaður fyrir jeppa og hann liggur upp að Mýrdalsjökli!!

Austfirðir

6.-9. ágúst fórum við í ferðalag um Austfirði. Fyrstu nóttina vorum við á Hornafirði. Næstu nótt vorum við á Egilsstöðum og þriðju nóttina vorum við á Fáskrúðsfirði. Veðurspáin var góð en þó að veðrið væri ágætt, þá var full mikil þoka. Við ætluðum t.d. í Loðmundarfjörð en hættum við vegna þoku. Við fórum í Mjóafjörð og ég verð nú að segja að mér finnst alveg furðulegt að fólk búi þar. Undirlendi er mjög lítið enda hefur þurft að breyta dráttarvélum svo að hægt sé að slá í öllum brekkunum. Þetta sést á myndunum sem ég tók og er í myndaalbúminu. Mér fannst einnig merkilegt að koma til Reyðarfjarðar, álverið er alveg hryllilega ljótt og eyðileggur annars fallegan fjörð. Ég skil ekki hvernig einhverjum datt í hug að setja þetta þarna. Fyrst eyðileggja stjórnvöld fiskveiðar og fiskvinnslu með meingölluðu kvótakerfi og svo er byggt forljótt og mengandi álver handa fólkinu. Þetta er hrikalegt rugl. En fólk virðist ekki vera neitt æst í að vinna í þessu álveri, ef farið er inn á mbl.is-fasteignir og leitað að eignum á Reyðarfirði til sölu, þá er niðurstaðan: 228 eignir fundust. Fólk er greinilega að flýja þaðan. Ég er ekki hissa, ekki vildi ég búa þarna og við vorum ekki lengi þarna, ég var svo hneyksluð á þessu að ég gleymdi næstum að taka myndir af þessu ljóta álveri, en tók nokkrar á meðan við keyrðum framhjá þessu ógeði. Að öðru leyti var þetta ágætis-ferðalag. Ég var reyndar hissa á að fara í gegnum göngin frá Reyðarfirði til Fáskrúðsfjarðar, þetta eru rosalega flott göng, minntu mig á Hvalfjarðargöngin, nema þarna þarf ekki að borga neitt. Fólkið fékk þessi göng líka í sárabætur vegna kvótakerfisins.

Við ætluðum að vera lengur í þessu ferðalagi en það var komin rigning og við vildum ekki pakka fellihýsinu blautu og verða svo að þurrka það í Blöndubakkanum. Við fórum Fjallbaksleið nyrðri heim, ekki mjög góður vegur og ekki fólksbílafær en við flugum yfir allar torfærur og ár á jeppanum, ég vorkenndi fellihýsinu að þurfa að elta okkur, það hoppaði og skoppaði fyrir aftan okkur en það kvartaði ekki og getur hvílt sig vel í vetur. Síðasta daginn keyrðum við sem sagt frá Fáskrúðsfirði og alla leið til Reykjavíkur, við komum heim um hálfeitt-leytið aðfaranótt föstudagsins 10. ágúst!

Ferðalag Dagur 9

Frábært veður í Laugarási og við vorum ekkert að flýta okkur heim.

Agnes Rósa var með Disney-spil sem voru svo flott að strákar máttu ekki vera með þegar við spiluðum. En þeir máttu horfa á.

Agnes Rósa, spilaeigandi.

 Við vorum með spil sem við notuðum ekkert, en það er bara fyrir stráka.

Við fórum svo til Reykjavíkur um 3-leitið og vorum bara ánægð með þetta 9 daga ferðalag. Það kemur öðruvísi út að eiga Landcruiser og fellihýsi en úrelt jarðfast hjólhýsi á Laugarvatni!! 

Ferðalag Dagur 8

Þegar við vöknuðum var smá-rigning. Við höfðum engan áhuga á að vera í rigningu svo við pökkuðum saman og yfirgáfum Vaglaskóg. Við vissum að fyrir sunnan var gott veður svo við fórum þangað, beinustu leið, sem sagt inn Eyjafjörð og inn á Sprengisandsleið. Ég get nú ekki sagt að það hafi verið gáfulegasta leiðin en við vorum jú á Landcruiser á 35 tommu dekkjum og Jón Óskar er með 38 tommu dekk undir sínum cruiser. Og á svona farartækjum er kannski ekkert gaman að vera alltaf á malbiki. Áður en við lögðum af stað í torfærurnar þurfti að minnka loftið í dekkjunum...

Ég tók nokkrar myndir á leiðinni

Svo hvarf annað dekkið af fellihýsinu hjá okkur og það var bara ónýt felga eftir!!

Ég mæli ekki með að þessi leið sé farin og allra síst með fellihýsi í eftirdragi.

Ég tók mynd af Jóni Óskari að taka mynd

Við komum svo í Laugafell. Ég mæli með klósettunum þar, upphituð og mjög notaleg!

Það var frekar mikill sandur þarna og svo urðum við stundum að fara yfir smá læki.

 

 

 

 Landcruiser-feðgar

Við mættum veghefli og þá var annar litur á veginum.

 

 

 

                                                                                           Síðan þurfti að bæta lofti í dekkin  og þvo!

Fórum í Laugarás og fundum tjaldsvæði þar. Vorum öll alveg dauð-þreytt eftir allan akstur dagsins.

Ferðalag Dagur 7

Vöknuðum á Hótel Varmahlíð um morguninn eftir góðan svefn. Fengum okkur hótel morgunmat t.d. brauð með sardínum! Lögðum okkur svo aftur. Yfirgáfum hótelið í hádeginu og fórum til Sauðárkróks. Þar fundum við opið hjólbarðaverkstæði og fengum gert við fellihýsisdekkið. Þegar við vorum búin að skoða Sauðárkrók nógu mikið fórum við norður fyrir Hofsós og stoppuðum í Lónkoti. Við ætluðum að koma Jóni Snæbjörnssyni á óvart, en þá var hann ekki staddur þarna, var farinn í sumarfrí!! En við skoðuðum tjaldið hans og hittum dóttur hans og hún bauð upp á kaffi og bláberjaostaköku.

Tjaldið hans Jóns

Jæja, við héldum áfram að keyra og skoða landið. Anna frænka var ekki á Siglufirði svo að við fórum ekki þangað. Fórum til Ólafsfjarðar en stoppuðum lítið þar, héldum áfram til Akureyrar og þar hittum við Jón Óskar og börn.

Fórum öll í Vaglaskóg og fundum góðan stað fyrir fellihýsin.

Agnes Rósa, Kristrún Heiða, Sindri Már og Jón Óskar.

Þau eru með flott fortjald við fellihýsið en þau eru ekki með spil á sínum Landcruiser!!

Bangsi (hundurinn þeirra heitir Bangsi)

Allir fóru snemma að sofa, því að það var langur dagur framundan...

 

 

Ferðalag Dagur 6

Fórum frá Hólmavík rétt fyrir hádegi. Næst var ferðinni heitið til Hvammstanga. Þegar við komum þangað ákváðum við að skella okkur í sund. Fín sundlaug hjá Hvammstöngurum. Við syntum nokkur hundruð metra, fórum í heita pottinn og svo uppúr. Svo keyrðum við aðeins útfyrir bæinn og komum að bæ sem heitir Mörk. Þar býr fólk sem við þekkjum; Siggi og Lísa. Þau voru heima, Siggi var að mála húsið að utan og Lísa var alveg tilbúin að sinna útkalli á sjúkrabílnum en hún var samt búin að gefa sér tíma til að baka tertu handa okkur, rosalega marens- og rjómatertu. (við vorum búin að segja þeim að við værum á leiðinni)

Valdi og Siggi.

 

 Það var gaman að heimsækja þau og sjá að það getur verið

líf eftir strætó. Lísa er að rækta íslenskar hænur í bílskúrnum, fyrir utan að keyra sjúkrabíl og Siggi er búinn að kaupa sér vörubíl með krana. En hans aðalstarf er að kenna í Laugabakkaskóla. Þau eru að rækta hross og eru með heimasíðu: www.123.is/mork

Eftir mikla kaffidrykkju og mikið tertuát, kvöddum við þau og héldum áfram norður fyrir Vatnsnesið. Við skoðuðum Hvítserk, ég tók nokkrar myndir af honum. Þetta er alveg einstakt fyrirbæri.

Hvítserkur.

Svo skoðuðum við Borgarvirki.

Fórum til Blönduóss, fengum okkur kjúkling og franskar á ENN-EINNI stöðinni. Vorum að hugsa um að gista á Blönduósi en keyrðum svo í Húnaver, stórt tjaldsvæði þar en svo gerðist svolítið mjög furðulegt, við fórum á Hótel Varmahlíð og fengum svítuna þar. Þetta kom okkur gjörsamlega á óvart, en við gistum sem sagt á hóteli um nóttina!!

 

                                                                                                           

 

Ferðalag Dagur 5

Jæja, við vöknuðum um fimm-leytið um morguninn við það að okkur var kalt. Miðstöðin í fellihýsinu var hætt að hita. Eftir smá-athugun fundum við út að rafmagnið var búið, við fórum að sofa aftur en um kl.8 fórum við á fætur og ætluðum að hita okkur vatn í kaffi, en þá uppgötvuðum við að gasið var líka búið! Hrikalegt ástand. Við fórum í tjaldmiðstöðina og keyptum okkur kaffi. Við urðum svo að færa fellihýsið að rafmagnsstaur til að geta hlaðið rafgeyminn. Svo lögðum við af stað norður Strandir. Fyrsta stopp var á Djúpuvík, fengum okkur kaffi á hótelinu þar. Ég tók nokkrar myndir og svo héldum við áfram og stoppuðum næst á Gjögri. En þar var ekki mikið að sjá svo við héldum áfram. Mér fannst mjög gaman að koma til Trékyllisvíkur en þangað fór ég á sveitaball fyrir u.þ.b. 27 árum, skemmtilegur staður! (ekkert að sjá)

Krossaneslaug. Ótrúlegt fjölmenni þar miðað við hvar sundlaugin er staðsett. Við fórum ekki útí.

Héldum áfram og komum í Ingólfsfjörð.

Í Ingólfsfirði fór fram atkvæðagreiðsla og var fellt með öllum greiddum atkvæðum að fara í Ófeigsfjörð, við neyddumst því til að snúa við.

En það var bara notalegt að koma aftur til Hólmavíkur og hitta fullhlaðið fellihýsi, við keyptum gas og elduðum rosalega góðan mat handa okkur. Á tjaldsvæðinu voru strákar að leika sér með bolta, en eftir að ég tók boltann af þeim færðist ró yfir svæðið.

Við sofnuðum alveg áhyggjulaus, með fullhlaðinn rafgeymi og fullan gaskút.

Ferðalag Dagur 4

Þegar við vöknuðum heyrðum við að það var byrjað að rigna, en það var ekki eins og við bjuggumst við eftir að hlustað á veðurspár í útvarpinu í gær. En við gátum lítið gert við því nema að taka saman. Við hættum við að fara út í Skálavík og upp á Bolafjall, vegna þokunnar. Áður en við yfirgáfum Bolungarvík keyrðum við um þorpið og leituðum að hjólbarðaverkstæði, fundum bara eitt slíkt en það var lokað en gefin upp 5 símanúmer sem mátti hringja í, við hringdum ekkert en yfirgáfum staðinn og fórum til Ísafjarðar, leituðum ekki að hjólbarðaverkstæði þar, fórum bara í Bónus og keyptum mat. Súðavík var næsta stopp, við tókum nokkrar myndir þar og héldum svo áfram inn Ísafjarðardjúp. Ótrúlega margir firðir, t.d: Álftafjörður, Seyðisfjörður, Hestfjörður, Skötufjörður, Mjóifjörður og Ísafjörður. Fórum svo Steingrímsfjarðarheiði og komum til Hólmavíkur um kl. 18:00. Flott tjaldsvæði þar, völdum okkur stæði og reistum fellihýsið. Fórum svo að skoða þorpið. Sáum hjólbarðaverkstæði en það var opið til kl. 18 og við vorum þarna kl.18:30, eigandinn var fyrir utan, við töluðum við hann og hann sagði að það væri lokað en möguleiki að kalla hann út. Við sáum enga ástæðu til þess þegar maðurinn stóð fyrir framan okkur og ákváðum að hafa dekkið sprungið áfram. Við fórum aftur á tjaldsvæðið, grilluðum kjöt, suðum kartöflur og borðuðum yfir okkur. Spiluðum heilmikið og fórum svo að sofa rétt eftir miðnætti alveg grunlaus um hvað biði okkar um nóttina...

Ferðalag Dagur 3

Við vöknuðum á svipuðum stað og við sofnuðum, þ.e.a.s. Patreksfirði. Fengum okkur kaffi í rólegheitum, veðrið var alveg ágætt en svo festum við fellihýsið aftan í jeppann og fórum að eyða olíu. Fyrst fórum við til Tálknafjarðar, þar var allt með kyrrum kjörum svo við skelltum okkur yfir Hálfdán og vorum svo allt í einu skyndilega komin til Bíldudals. Þar var allt enn rólegra en á Tálknafirði, t.d. er engin bensínstöð í pleisinu, bara einn sjálfsali Það voru útlendingar að reyna að kaupa bensín en voru ekki með nein kort, bara seðla, þau voru í stökustu vandræðum en svo kom ég með VISA-kortið mitt og bjargaði þeim. Við hliðina á bensínsjálfsalanum er veitingastaður og þar er hægt að kaupa ýmsar matvörur og svo er hægt að fá sér hamborgara og franskar (ég gat ekki sleppt því) svo við fengum okkur að borða þarna og svo var ferðinni heitið í Selárdal. Við geymdum fellihýsið á Bíldudal á meðan við fórum þangað. Í Selárdal var mjög gaman að skoða öll listaverkin hans Samúels, þetta er alveg ótrúlegt. Uppsalir eru svo aðeins innar í dalnum, við létum okkur nægja að skoða fjárhúsin hans Gísla, þau eru orðin dálítið hrörleg svo ekki sé meira sagt.

   

 

 

 

Fjárhúsið Uppsölum Selárdal.

 

Fórum svo til baka og fundum fellihýsið okkar, fórum Dynjandisheiði, keyrðum framhjá Hrafnseyri og komum svo til Þingeyrar. Þar fórum við inn á ENN-EINA-bensínstöðina og eyddum smá-peningum, Fórum svo til Flateyrar, þar var ágætt tjaldsvæði en við ákváðum samt að fara í Tungudalinn en það var svo mikið af fólki þar og okkur fannst ekki vera pláss fyrir okkur þar þannig að við fórum til Bolungarvíkur. Þar var gott tjaldsvæði við sundlaugina og við plöntuðum okkur þar. Svo fórum við að skoða sundlaugina og eftir að hafa tekið eftir að rennibrautin er ekki enn tilbúin til notkunar var ákveðið að láta nægja að fara bara í sturtu þarna.

Þetta er rennibrautin

sem var ekki tilbúin til notkunar.

 

 

 

Við fórum svo bara snemma að sofa til að vera í formi til að kíkja á Bolafjall og Skálavík daginn eftir.

Ferðalag Dagur 2

Vöknuðum í góðu veðri. Eftir að hafa fengið okkur kaffi tókum við saman og fórum frá Reykhólum. Ferðinni var heitið alla leið út á Látrabjarg. Við lentum í því að það sprakk á fellihýsinu á leiðinni þangað. En vegirnir eru bara svo leiðinlegir á Barðaströndinni.

Ég tók nokkrar myndir af lundanum. 

 

 

 

 

 

Hótel Breiðavík

 

 

 

 

                                                                                                           Samgöngusafnið, Hnjóti

Kíktum svo á Rauðasand, en slepptum að fara í Hænuvík. Förum þangað seinna.

Fórum svo til Patreksfjarðar og þar er ágætt, ókeypis tjaldsvæði, stór flöt sem hallar ekkert. Ákváðum að vera þar um nóttina. Fengum okkur bjór og hvítvín eftir matinn og sofnuðum svo fljótt og örugglega!